當上市公司原有業務發展已臻瓶頸，要謀求更大發展和盈利突破就要諗計，所以公司業務玩變身、轉型，本來就係家常便飯之事，唔值得大驚小怪，市場輿論不必過早妄下定論，亂作褒貶。
作為散戶最關心應係公司變身，究竟涉足哪一門生意，有冇「錢」途先係最重要。現時潮流興搞新能源開發，唔少上市公司都循呢個方向搵機會，究竟從中應該點揀？
星俠以為，要睇有關股份變身之項目是否有國策推動，如有關項目係國家大力支持，按理應可在芸芸同類股中鶴立雞群，睇高一線。
香港體檢（397）剛宣佈，旗下全資附屬中國保綠能源與河南鄭州市政府控制之鄭州高科技創業投資合組聯營企業，投資開發及產銷非晶硅薄膜太陽能光伏模塊，涉資額達32.5億元人民幣。
香港體檢泊到國企級碼頭，值得加分，而且薄膜唔同多晶硅，生產成本較輕及符合環保，未來行業趨勢此消彼長，炒太陽能要投薄膜一票。
香港體檢復牌後強勢畢露，昨逆市升14%，報0.73元，短線有力挑戰1元。
方星俠