繼賓架P之後，賓架W又收到一份「博士」要約（offer），但上次有關機構要求賓架P捐款八萬美元以作準備請柬、榮譽博士袍、證書及獎項兼頒獎典禮費用，今次賓架W收到嘅條件就好唔同，完全不提八萬美元，只係叫佢「自願捐助」啫。咁大方？捐五百美元得唔得呀？攞番個博士學位，好抵噃。
不過賓架W係老實人，絕不攞人便宜，人哋搞咁多嘢，都要成本及盈餘嘅啫，所以賓架W回覆對方，「恕不奉陪」，有博士學位任攞都唔要，賓架W都算有風骨。當今咁多博士隨街行，如果唔怕冇禮貌，大可問一句：「佩服佩服，請問博士論文寫乜嘢題目呀？」
大概有啲人以為博士唔難到手，搵錢好容易，於是冒銀行之名想搵笨，同賓架W傾完電話後，睇吓電郵，竟然有一位自稱LKC嘅人士來電郵，話銀行水浸，現有二千餘萬美元可供中小企借貸，有意者可電郵，詳述公司/個人資料，讓銀行審批。唉，呢啲橋算舊到唔恨咯，仲有人釣魚？呢位LKC自署係某大銀行西灣河分行「執行董事」，簡直笑大人個口，銀行就有執行董事啫，西灣河分行都會有一位董事？將封電郵刪除後，又收到一封自稱係美國大銀行JPM，要更新客戶資料，即刻刪除之。
其實寫信或用現代方法，透過電郵，向別人講銀行有幾千萬以致幾億美元待借，完全呃神騙鬼，點會搵到人上釣o架？有人被騙嘅話，邊度值得同情吖。呢條橋最盛行之時，聽前輩講，乃係七十年代後期尼日利亞啲貪污錢周街流通，以及伊朗發生政變，沙皇（Shah）倉皇辭廟走時，當年唔少香港及東南亞商戶收到信，話有好多尼日利亞錢及伊朗沙皇錢存在銀行待借，但左丁山多年來從未聽到有人上當，故此至今仍然有人樂此不疲，實在令人莫名其妙。