甄子丹家喺上海趕拍劉偉強執導嘅《精武風雲》，但下個禮拜佢會返香港出席《十月圍城》首映禮。佢對呢部戲都好重視，部戲臨殺青前，子丹都有幫手做武術指導，所以監製陳可辛為咗多謝佢，噚日特別飛去上海設下擂台，頒「甄功夫」嘅美名予甄子丹，劇組仲將佢拍嗰段嘅菲林送畀佢留念。
李小龍再現
原來喺《十》片度，子丹同重達200斤嘅世界拳王李康打咗一場交，拍完呢場戲後，佢話：「好似同隻牛戰鬥，但我相信觀眾對呢場戲會有期待。」
陳可辛睇完片後亦話：「事隔咁多年，諗唔到子丹可以將李小龍嗰種拳拳到肉嘅真實感打法，再呈現觀眾眼前。不過因為打得搏命，佢嘅坐骨神經舊患又復發，搞到佢要忍住痛開工，而且子丹身在美國嘅祖母過身，因為要趕戲，佢冇返到美國，但祖母過身，佢真係好難過。」