政務司司長唐唐今日到中大攞佢個榮譽法學博士學位，一班中大師生校友揚言踩場抗議，中大學生會會長林朝暉噚日同八方講，為咗尊重畢業禮，佢哋唔打算搞衝擊行動，只係呼籲同學待唐唐「條條fing」上台時，齊齊起身自轉180度背對個台，以示中大學生冇眼睇校方嘅所作所為。
菜園村村民擬「贈興」
林會長提醒有意「唔畀面」唐唐嘅同學，要留意畢業禮程序，當聽到主持叫HenryTang上台就準備起身，千祈唔好掛住打機釣魚，轉身之後唔好快閃，直至唐唐被扑完頭為止。
除咗學生會，八方知道有畢業生準備好面具同紙牌到來贈興，菜園村村民高春香噚日亦同八方講，正考慮今日上中大「賀」吓唐司長。
兩年前中大頒榮譽博士學位畀前特首老董時，有近百學生請願，搞到老董都要問學生，可唔可以畀自由佢講落去，今次學生只係拎轉面，其實算好畀面唐唐。