李樂詩（Joyce）今年10月誕下愛兒李然熙（Maxton），因坐月期間不能濕水，令她無機會替囝囝冲凉，享受親子樂，近日坐完月的她即急不及待嘗試為囝囝洗白白，新手媽咪手腳敏捷，Maxton也顯得十分享受。不過Joyce笑言至今仍害怕囝囝嘔奶，指他如放飛劍般勁力十足，感覺猶如拍武俠片。
李樂詩的囝囝李然熙已兩個月大，精靈活潑，她也十分享受湊仔樂，更開始心思思再追個囡囡，湊成一個好字。她表示已跟夫婿Ted商量，有意待一年後再造人，她昨日在電話中說：「我好想Maxton將來有伴，想佢哋嘅年紀近啲，不過家囝囝仲細，好需要我多啲時間照顧佢，我又可以唞一年，咁就啱啱好。」
最怕掃風
坐月期間Joyce除不停進補，她也在陪月人員指導下，掌握了不少湊B竅門，還學會替囝囝冲凉，Joyce說：「Maxton初生嘅時候怕水，一冲凉就狂喊，家大啲，佢開始好鍾意冲凉，每次我同佢冲嘅時候，佢都一臉好享受嘅表情。睇見佢咁舒服，我就開心晒。」
榮升母親兩個月，但Joyce坦言至今還是最怕餵奶後替囝囝掃風，她說：「有時佢大啖將啲風噎出嚟，仲會吐埋啲奶，有時勁到好似武俠片放飛劍咁，搞到我都嚇親，反而囝囝就唔驚。」
逐步復工
近日Joyce開始逐步復出工作，前幾天還陪丈夫Ted到澳洲公幹3日，首次離開愛兒身邊，Joyce笑言全程心掛掛，她說：「我成日用電腦視像睇囝囝喺屋企情況，有時冇得上網就拎iphone睇佢嘅短片，以慰相思之苦。」下月她還會應邀做麥潔文、彭家麗、方伊琪和李麗蕊的「女人心聲2010演唱會」嘉賓，她打算到時帶同囝囝撐場。 採訪：比華利
