豬流感死得人，打疫苗又可能有副作用，半生不死癱瘓就真係獻世，正式打又死，唔打又死，連政府都要市民打針前先簽生死狀，仲唔係驚死市民打針後有副作用而早早卸膊？喺人心惶惶情況下，隨時令豬流感針嚴重滯銷，枉花七億元公帑買疫苗。
為咗促銷賣藥，八方收到風，當局下星期四（12月17日）會搞一個大型打流感針活動，食物及衞生局局長周一嶽、醫管局主席胡定旭、衞生署署長林秉恩三名香港醫療系統巨頭，會身先士卒上陣打針，港大感染及傳染病中心總監何柏良都有份，真係星光熠熠。
毒魚風波曾做食魚騷
根據當局指引，肥人屬高危人士可優先打針，周、胡、林三人份量十足，八方認為畀佢哋打尖都冇所謂，況且周一嶽同林秉恩都係醫生，領正牌第一批打針，而醫管局亦決定免費幫所有董事局成員同職員打針，肥胡自然有份，由佢哋試針真係冇搵錯人。
周一嶽經常遇到大鑊嘢，為咗善後已經唔係第一次做呢啲公關真人騷，幾年前淡水魚驗出含有孔雀石綠，市民聞魚色變，食肆喊咁口，周一嶽就同成班高官、議員一齊去酒樓做食魚騷。周一嶽自甘做白老鼠，咁樣先算做好佢份工嘛。既然局長咁搏命，政助、副局長都應該出動喎，就算唔合資格打免費針，自己畀錢都應該注射疫苗，要做好呢份工，就唔可以太錫身，付出少少代價啫，未必咁唔好彩打到瞓低嘅，可能只係神志不清倒後行呢。
至於其他高官，好似特首煲呔，會唔會現身打好呢支針，據講仲要諗諗，既然民望回穩，可以做少場騷咁話。政府要求市民打針前簽生死狀，唔知周一嶽會唔會做戲做全套，大筆一揮，各安天命。
mailto:[email protected]