東亞運開幕至今,當局每日都透過手機短訊向已登記嘅記者發出溫馨提示,通知最新採訪消息,但昨晚竟在半小時內連續發出同一短訊20次,「炸爆」記者手機,令唔少行家發火,東亞運解釋係電訊商短訊系統故障所致。
疲勞轟炸式短訊噚晚7時左右發出,內容係關於今日下午3時喺文化中心有個文化嘉年華開幕,不堪被滋擾嘅行家頂唔順,致電短訊內嘅查詢電話投訴,點知原來係協辦嘅康泰旅行社電話,東亞運連環擺烏龍,康泰都係苦主。
據知東亞運係透過李超人旗下電訊公司3香港發出SMS,有行家陰謀論,笑言可能東亞運不甘被傳媒有彈無讚,所以反轟記者還以顏色。