候任港交所（388）行政總裁李小加作為一個海歸派金融人才，噚日佢出席一個財經界人力資源研討會時，就建議香港將嚟自本地、內地以及海歸派嘅三大派系華人金融專才，組成一個大團隊，咁香港肯定可以「攞盡所有獎牌」。
港交所員工平均加薪2%
李小加話，香港唔缺金融人才，因為自由開放，吸引到全球精英華人嚟做落腳點。但佢觀察到中港企業只會請番「自己人」做高層，只有國際金融機構融合到嚟自唔同背景嘅三方華人，不過華人喺國際機構做到高層機會好細。
佢希望三方華人睇到對方缺點時，亦睇對方優點，就好似跑得慢嘅人可以跑一千米賽事，跑得快嘅可以跑50米，好好合作先可以發揮最好成績。講到搵人才，當然要睇人工，佢透露港交所下年加薪平均2%。咁有薪加當然好喇！