電視不停賣廣告，令到本來無興趣嘅人，變成有少少興趣；有少少興趣嘅，變成好有興趣。死喇！套戲下星期先上，講咩o架？不如自己做男主角，率先探索呢個新特技外星空間；隻Game有得賣喇，第三身動作，淨係賣占士金馬倫個朵都夠殺啦！
文：阿洛
我唔止6呎高
講隻Game嘅劇情等於講套戲！想咩都唔知就入戲院嘅請飛過呢段！
《JamesCameron'sAVATAR:THEGAME》（阿凡達）故事背景係未來世界，因為人類想取得另一星球資源，所以就要去Pandora星球探索；正所謂入鄉隨俗，被派去嘅主角係受傷退役軍人，接受實驗就要同當地嘅Na'vi星人DNA溝一溝，變成身高近3米嘅阿凡達。但同時間，強搶星球資源嘅RDA部隊又入侵Pandora，正義嘅朋友當然幫理不幫親做「藍戰士」啦！
電影同步開發
電影改編遊戲一向有種麻麻哋感覺，不過《阿凡達》就有啲唔同，廠房聲稱呢隻Game係目前唯一同電影同步開發，而唔係只係套用電影現成內容加以改編嘅遊戲。甚至導演占士金馬倫都反過來喺遊戲設計中，採用不同元素用到電影拍攝上。
玩落遊戲中嘅奇妙自由世界又的確過癮，動作元素多，故事劇情亦緊密，占士更話會喺Game版《阿凡達》裏，盡力帶給玩家完全身歷其境及最新3D技術嘅電影體驗。
做軍人定做怪人
遊戲仲有一個賣點，就係除咗有雄偉戰爭外，仲可以體驗到人性掙扎。玩家可以揀做外星種族或者係人類RDA部隊，體驗部份連電影都無法傳達嘅觀點。連線對戰玩法則可以揀超過60款RDA或Na'vi武器，另外每個部族均有不同技能，超過20款選擇令你嘅部隊更加個人化。正常嚟講，梗係做Na'vi星人啦！一來好打啲，二來地球人咁虛偽，唔通打機都要搶人嘢咩？
Profile
遊戲：《阿凡達》
機種：PS3、Xbox360
製作廠商：Ubisoft
類型：動作
人數：1人