泓鋒國際（2309）噚日舉行股東特別大會，通過改名做伯明翰環球控股（下圖係公司新LOGO），為港爭光嘅第一華人英超班主楊家誠應該飲得杯落，事關佢入主後，伯明翰7場聯賽除咗首仗輸畀阿仙奴，跟手就連續6場不敗，係威係勢，家公司打正伯明翰牌頭，學佢兩個執行董事話齋，淨係伯明翰個Brand，已經引伸出無限商機，好似服飾、廣告、傳媒推廣以至飛機上面嘅媒體平台云云。
不過，唔知楊班主係咪怕醜定真係咁忙，噚日開完股東會都冇時間見一見財經記者，要大家呆等完都係要食白果。之不過，值得一讚嘅係，噚日夾埋有6個記者等佢賜教，當中兩個係佢旗下傳媒（一個《成報》，一個《富周刊》），楊生都一視同仁，算係公平對待啦。