牙醫L家姐隻馬係○七/○八季度配售馬，出八場，輸八場，十二月六日出第九次，因連續大敗，五場共輸近八十個馬位，跑泥地一六五○米全無把握，臨場有五十四倍，無人理會，但牙醫L、家姐、阿哥陪住坐輪椅嘅媽咪入場，只係唔見佢太太賓架L啫，似乎有啲動靜噃。開閘前三分鐘，隻馬竟然落飛，着埋綠燈，去到四十零倍，邊個擺錢落去呀？牙醫L驚死左丁山睇唔見，大聲講，「喂，我地隻馬落飛呀！」落就由佢落啦，點贏呀？一於唔跟風，點知隻馬一出閘就放，就此放返終點，派彩四百三十幾，三重彩派四萬三，連贏位派二千四，牙醫L阿哥對左丁山講：「唔好話唔通知呀！」自己斗零冇買，真係暈得陣，跑馬就是這麼神奇。牙醫L係孝順仔，佢話：「我唔恨贏錢，只恨同阿媽影張頭馬相啫！」
凡馬主皆恨贏馬，亦嬲自己做咗疑似老襯。上星期日在馬場聽到，今個星期日（十二月十三日）國際賽之一千二百米短途錦標賽有一隻澳洲馬叫做「萬籟俱寂」（AllSilent）在澳洲贏過五場，包括兩場級際賽，來港挑戰「蓮華生輝」、「阿帕奇貓」、「熱爆景點」等著名短途快馬，睇落冇乜可疑之處。但係賽馬世界嘅資訊非常發達，查清楚網上資料，「萬籟俱寂」原來就係以前蔡約翰馬房嗰隻「潮汕菁英」，馬主本來係陳智思爸爸陳有慶嘅。馬主陳屬大富豪級，養馬旨在過癮，現役馬就有一隻「玉峽生輝」，放在蔡約翰馬房。佢前年買咗一隻「潮汕菁英」，來港一直操而不出，後來蔡約翰認為隻馬有事，不宜在港比賽，建議退役，於是陳會長將隻來價近二百萬港元嘅馬賣咗，賣價聽講係一萬澳元，蝕晒大本。原來買家就係蔡約翰外父白理維，交畀兒子白利偉訓練，在澳洲贏馬唔在講，竟然贏埋兩場一級賽，有資格再度來港出戰國際賽。如果你係陳會長，感覺會係點呢？
佢啲朋友好戥佢唔抵，認為隻馬在澳洲威威，舊馬主可以當睇唔到，但返香港作賽，如果一個唔該，贏埋「蓮華生輝」等名駒（英國博彩公司開盤，係大熱門），你話點先至可以順番條氣？此乃近年罕見之馬主激氣個案，馬會將隻馬名譯做「萬籟俱寂」，唔用番原名「潮汕菁英」，大概係唔想刺激有關人等，實際上如果陳會長唔係有修養嘅話，已經「嘈到坼天」！