劉嘉玲早前拖丈夫梁朝偉返家鄉蘇州恩愛宣傳，以行動反擊過氣情敵張曼玉說攬偉仔大髀頒獎的敏感言論。昨日44歲牛一的嘉玲繼續晒命，先收法國牡丹靚花，再偕老公開P共度牛一宣示正印地位，未料其外籍鄰居加料贈興，昨踢波誤中嘉玲寓所範圍，一時心急爬牆入屋執波，致鬧出一場報警疑雲。
劉嘉玲昨日44歲生日，下午她先收靚花，後有老公梁朝偉陪伴慶祝，暗戰過氣情敵張曼玉，再次贏晒。
昨午近4時，一名男士捧着一大紮購自中環Armani花店、夾雜着粉紅色法國牡丹的花束抵達嘉玲及偉仔的山頂和福道愛巢，在場記者問到送花者是否姓梁，該男士只說：「梗係唔係啦。」收花者是否姓劉？男子卻不作聲。其後保安員開鐵閘讓他入內，見他直往嘉玲寓所方向進發。
欲爬圍牆執波
其實昨日牛一的嘉玲早已有備而戰，記者發現其寓所窗門經改裝，由大窗變細窗再落簾防偷拍，嘉玲以為萬無一失，豈料仍鬧出一場小風波。近6時住她對面的外籍男鄰居踢足球時，一記世界波符碌踢進嘉玲獨立屋住所的花園，他隨即站上垃圾箱爬過圍牆執波，嘉玲助手誤為記者闖入，衝出屋外以廣東話喝止道：「你擒入嚟做乜呀？我報咗警喇！呢度私人地方嚟o架。」外籍鄰居連忙致歉並自行爬出屋外。
雖然因鄰居踢烏龍波搞到助手聲言要報警贈興，但無損壽星女心情，據知她應一如往年，與偉仔留在家中同度生日。昨晚約7時更有友人捧着選購自中環太子大廈SEVVA餐廳的生日蛋糕及棉花糖抵嘉玲寓所，跟她開P賀壽。
上月底曼玉赴台擔任金馬獎頒獎嘉賓時曾公然撩偉仔，敏感言論惹來觀眾嘩然。翌日嘉玲馬上拆招，拖偉仔現身蘇州家鄉的房地產活動，以行動言明「三人行」難過登天。
採訪、攝影：黃文偉、李志明
