擔任花旗國聯儲局主席最大好處係乜？竟然係搭飛機check-in快啲。伯南克（圖）前日出席參議院銀行委員會聽證會時，俾問到做聯儲局主席有乜最大着數，佢二話不說，答話喺機場過關唔使等咁耐喎，安全檢查亦爽手啲，仲可以比其他乘客多帶3盎斯液體。
伯老手握花旗國經濟命脈，制定貨幣政策，影響全球經濟，美國子民點會信佢唔過呀！唔通以為佢搭飛機會拎埋個液體炸彈上機自殺咩，而機場安檢又點會叫伯老除晒衫褲搜身，咪講笑喇！
幽默講息口玩番記者
華華真係估唔到平時木口木面嘅伯老咁幽默，佢喺聽證會上仲玩番記者轉頭，事緣有記者問佢，可唔可以私底下講吓美國息口未來走勢，希望畀份獨家料交差，伯老好爽快咁即時話好，然後當眾講：「我好肯定話你知，利率唔會再低了。」