炒變身股，可以當佢輪咁炒，即市轉身絕對夠位；若想長期持有博倍升，可以話係對管理層投下信心一票，希望轉型成功，估值爆升。最新例子有每幾年都變一變嘅香港體檢（397），本身喺06年轉型做醫療保健，最近化身太陽能股，宣佈同鄭州高新科技合作發展非晶硅薄膜光伏業務，投資額要成33億元。
玩醫療概念只得幾年嘅體檢，一度係市場熱炒對象，07年6月最高時炒到5毫1，咪以為噚日升近四成好筍，半年前50合1，當年5毫1買入即係成本25.5元，仲未計過去幾年行使嘅CB同認股權。落唔切車嘅散戶難逃50合一命運之餘，最終淪為毫子股，咁到底今日又泊到乜嘢好碼頭，可以蛇吞象，以市值3.3億元（復牌前）變身光伏巨企？
先了解吓呢個拍檔，係鄭州高新創投公司，亦即係鄭州市政府出資，2000年成立嘅創投基金，註冊資本3000萬元（人民幣．下同），正值當地總投資額70億元嘅河南省新國家科技園動工，預計2015年起好，到時該區投資可望有300億元，目標定位係新能源高科技重鎮。
各省市爭相搞光伏新能源
體檢即時宣佈改名做中國保綠，當地媒體形容係大型投資落戶鄭州的第一步，對河南打造光伏產業有重大意義。第一期投資7.6億元，到2013年500兆瓦產能先會全部投產。鄭州市政府力谷太陽能係想食住國策條水，所以河南電力實業集團上年已同尚德簽咗產業戰略協議，但一直只聞樓梯響，直至體檢出現，呢個科技園招商活動先有起色。
河北邢台市又話搞「陽光小村」試點，小小村莊將要整數以百計風光互補型路燈，同全太陽能住宅。官員話，邢台用於生產硅材料嘅石英砂儲量逾10億噸，當地煤炭國企「冀中能源」嘅三氯氫硅項目年底投產，將成為中國最大的多晶硅原料基地，仲話有20家知名企業已答應發展，邢台3到5年後就建成國家級光伏產業基地。
各省市各出奇謀爭資源，光伏等新能源肯定已見泡沫，唔知體檢董事會內咁多醫生專才，對整個行業佈局了解有幾多？知否三氯氫硅用嚟做乜？
胡孟青