大市調整進入第3日，恒指再跌264點，收市22060，仍守穩在22000點大關之上，市底仍然算強，再等多一兩日，調整就會完成，再升穿23000點唔係難事。
現時係資金市，大把銀両追逐股票，一有資金埋位，股價閒閒哋都升十幾個巴仙。呢幾日，大行同基金主力推低大價股，但股仔就繼續精采，噚日大跌市，但上升正股仍超過470隻，升幅超過10%都有32隻。
御泰中彩（555）不愧為最實淨福彩股，兩日跌市中都逆流而上，噚日更大升8仙，高收0.90元，升幅9.7%，成交仲係好「墟冚」，有8600多萬股，中期升浪已啟動，目標維持1.25元。
內房股陸續升溫，月初推介的中渝置地（1224），當時股價3.81元，在4元關略作整固後，升勢再起，昨日高見4.23元後回收4.17元，仍大升0.24元，升幅6.1%，成交8400多萬股，比前日大增3.2倍，不時見有大手掃貨的手影，由於已確認升破4元的前浪底阻力，短期上升目標指向5元，中線可重上今年7月高位6.60元。
深圳控股（604）係下一隻有動力會出現爆升的內房股，昨日高價3.93元，收3.87元，升9仙，升幅2.38%。睇周線圖，深控過去兩年嘅走勢，係一個好「完美」同「典型」的複式頭肩底收集形態，頸線阻力在4元水平，現時10周線已重上20周線之上，而MACD亦出現「雙牛」入貨訊號，確認中期上升大浪即將展開，照度上去，目標係7元。
衝破4元就要追
深控基地在深圳，深圳樓市轉旺後持續升溫，對深控極為有利，09年（12月年結）中期盈利5.2億元，升78%，下半年有更多物業落成，全年盈利可達15億元，每股盈利0.44元；2010年，每股盈利可上升到0.52元。
深控7元目標價，預期升80%，似乎遙不可及，但以明年盈利計，預期PE只係13.4倍，又似乎並非不可能。內地房地產業前景看好，深控此類有強勁政府背景的偏低股，要優先留意，一衝破4元，就要追入。
郭兆誠