政務司司長唐公子唔似係蒲蘭桂坊嘅人，稍後卻破天荒到老蘭尋開心。記協創新猷，每月舉辦高官政要名人飯局同傳媒行家近距離接觸，打響頭炮嘅係唐公子，今個月18號應邀到德己立街榮華大廈DCorner開飯兼演講，主題係佢負責嘅政改諮詢。
據講呢間餐廳甚有情調，不過同唐公子撐枱腳，八方相信大家志不在食，呢個午餐聚會「主菜」係演講後大半小時答問環節，想同唐公子自由搏擊？記協中人話要盡快報名，事關場地所限，只可容納約50人，會員價200蚊，非會員250蚊，學生會員150蚊，查詢可致電：25910692。節目預告，1月飯局嘉賓係練乙錚。