呢排俾啲手術室護士搞到好頭痕嘅瑪麗醫院院長賴福明，噚晚就好鬼高興，事關佢做埋呢個月就退休，醫院上下噚晚同佢喺中環某酒樓開歡送會。之不過，歡送完佢都未知邊個頂佢個位，查實佢呢個位要頂得住港大班大教授，仲要臨時臨急有高官入去通波仔，少啲份量，唔夠薑嘅人都唔敢接莊。
瑪麗要搵一哥，雖然呢個位惡做，不過重賞之下必有勇夫，八方聽聞有幾個猛人角逐得好激烈，分別係聯合醫院、即係九龍東聯網總監陸志聰，葛量洪醫院行政總監李文豪，同埋瑪麗副總監陳志權醫生，極有可能下周就知花落誰家。
三人各有優勢，陸志聰由廣華調去睇聯合之後，雖然聯合屢次遺失病人資料嘅USB手指，又有輸錯血畀無貧血嘅病人等事故，不過人稱CC嘅陸醫生勝在年輕有魄力，又做過醫管局總部行政工作；李文豪（JosephLee）係外科醫生，做過青山同小欖醫院行政總監，又喺總部署任過事務總管，舊年做咗葛量洪醫院阿頭，同屬港島西聯網，正式近水樓台。
醫管局青黃不接
陳志權醫生則係瑪麗內科顧問醫生，佢係公共醫療醫生協會首屆主席，當年籌組醫管局，好多政府醫生面臨轉制抉擇，佢就搵工會去同政府爭取醫生轉制嘅條件，後來佢喺瑪麗做好多行政工作，家坐瑪麗第二把交椅，係副行政總監（臨床服務），佢優勝之處係好熟習瑪麗運作，同港大啲關係都唔差，屬內部晉升不二之選。
查實賴福明應該早就退休，一直退唔到，都係因為醫管局青黃不接，之前搵人頂九龍西聯網總監趙莉莉個位都好傷腦筋，瑪麗醫院更難，因為瑪麗一哥唔單止要同港大醫學院合作，仲隨時有高官貴人入院，做院長行慢啲都唔得，好似早排財爺突然要通波仔，賴福明都要飛撲返去睇場。
賴福明由醫管局成立之初，已經係楊永強左右手，小強最終黯然下台，賴福明福氣得多，八方希望佢退休後得閒去美國弄孫為樂。
mailto:[email protected]