《蘋果》李八方喺星期六（十二月五日）寫嘅「主題曲」係「麥嘉軒未出嫁先出書」，可能係憑想像，挖苦劉遵義校長之作，為挖苦而挖苦，十分有創意。
中文大學出版《香港稅務》，歷史悠久，係詹德隆出任中大出版社社長時期嘅出品，大學出版社不是商業出版社，好難收支平衡，譬如中大出版社推出「錢賓四先生學術文化講座」一系列世界級文史哲大師嘅演講實錄，學術價值甚高，但在本港書店能有多少銷路？詹德隆當年高瞻遠矚，搵到畢馬威（KPMG）合作，由會計稅務專家撰寫一本HongKongTaxation:LawandPractice，只出英文版，內容有若干學術性，不違背大學出版社之宗旨，但大部份係實用性，好啱會計行業人士。此書一出，就成為中大出版之暢銷書，每年不少會計師、會計系學生、海外人士買嚟作參考，之後不時加插新材料，新法例個案，每年出新版，行銷歷久不衰，為中大出版社帶來不少收入。
陸國燊博士（現商務印書館董事總經理）於九八年出任中大出版社社長，將《香港稅務》加多一個中文版本，麥嘉軒係稅務專家，現任畢馬威之taxpartner，佢係2004年版作者之一，十分正常。李八方引述八卦雜誌講劉校長獨具慧眼，「未來中大校嫂能夠躋身其中」（即饒公、許倬雲教授之列），實在係對事情完全唔了解。
曾聽出版界人士講過，中大出版社之《香港稅務：法例與實施說明》可能係肥仔水，英文年銷四五千本，中文版銷二三千，恨死其他出版社，無法子唔讚詹德隆當年度到呢係好橋。點解其他出版社唔出版同類書籍嚟爭過呢？出版界人士說：「有幾個理由嘅，（一）中大嗰本有歷史有地位，（二）要搵四大會計師行其他三大之一合作，先至可以砌畢馬威，（三）開發新書成本高，中大嗰本年年改一啲就可以出，成本便宜好多。有市場人人都想爭，但啲行家諗過度過卻唔制，梗係有理由o架啦！」劉遵義相交滿天下，最近泰國公主就特別帶埋幾位泰國學者，包括朱拉隆功大學副校長訪問中大，聽劉校長及其他教授講書，但麥嘉軒與DavidSmith之《香港稅務》豈可與劉校長扯上關係。