燃氣股長炒長有，箇中誘因不少，首先係內地正值嚴冬，天然氣需求「多多唔夠」；其次市場憧憬內地天然氣價格機制將有新突破；第三係燃氣企業年內均各有動作，好似中國燃氣（384）醞釀分拆海外業務上市，股價昨升6.4%，創52周高位，收報3.64元。燃氣股有呢幾項利好支持，走勢一浪高於一浪。
港華燃氣（1083）再獲4個內地管道燃氣項目，分別位於廣東、山東、江西及安徽，合共涉資達4.4億元人民幣，集團所佔權益介乎42%至100%。成功取得以上項目後，港華目前手上管道燃氣項目接近50個，遍佈國內11個省市，可進一步鞏固內地城市天然氣的市場地位。
內地對民用水電煤等收費有一定監控，好難期望大幅加費，反而工商用途就唔係咁講，工商用燃氣加價一直傳得好勁，話唔定新價格機制先向工商用戶埋手。
港華上述4個項目均設在工業區，可謂開正佢嗰瓣，因工商用戶佔其銷量達70%，明顯受惠今次收購以至未來氣價上調的憧憬。港華昨升1%，收3.08元。現價可買，首目標3.50元。
方星俠