身兼工聯會會長嘅行會成員鄭耀棠早前「預告」，有意拉攏志同道合之士成立「政制向前走大聯盟」抗衡泛民，喺愛國愛港陣營份量十足嘅棠哥吹雞，左派中人點會唔支持？棠哥話自從組織聯盟消息曝光，日日都接到唔少電話報名參加，有啲十幾年都冇打電話畀佢嘅人，今次都為政改蒲頭，反應之熱烈出乎佢意料之外咁話。
加開兩場諮詢會
棠哥唔肯透露有乜猛人埋堆，只係講好多知名商界人士，下星期一正式公佈詳情一定有驚喜。雖然棠哥冇透露大聯盟有乜具體動作，但相信街頭簽名同講座、論壇唔少得。立法會政制事務委員會上周末舉行首次政改諮詢會，出席者眾，委員會決定喺1月9號同12號加開兩場諮詢會，八方相信支持與反對政改兩派人馬會晒冷赴會，欲免向隅，立法會秘書處呼籲大家從速報名，本周五就截止。