早排同台積電上演一幕宮「芯」計嘅中芯國際（981），年逾花甲嘅創辦人張汝京（洋名李察）俾台灣幫叮走之後，業界都以為佢可能豹隱江湖，但原來佢老人家正密謀東山再起，不過唔係搞佢嘅強項半導體，而係返寶島老家搞環保節能。呢輪咁多人搞風力發電，唔通李察玩埋一份﹖
與台積電和解有利
至於點解今次同台積電和解，原來好似好簡單：寃家宜解不宜結喎！對李察嚟講，喺中芯咁走人話晒都唔算一個happyending，行內人話佢識得起廠但唔識經營，又有人話佢掌權9年蝕足9年。咁佢自己又點睇自己呢？李察近日接受台灣報章訪問時話，自己喺推動兩岸產業互補上，至少做過一次領頭羊，而同台積電片足咁多年，佢話最後和解點都好過唔和解，早幾個月搞仲好，因為咁樣大家或者會有好多合作空間，總之佢到最後一刻都仲有份去參加談判，家呢件事已正式畫上句號。
查實計華華講，作為上市公司負責人，乜都應該係以股東利益為大前提，李察同台積電張忠謀積怨9年，淨係06年起計嘅律師費，就花咗最少1億人民幣！雖然華華唔敢話雙張誰是誰非，但如果1億拎嚟派息，唔會有人話唔啱啩！
李華華
mailto:[email protected]