李克勤同老婆盧淑儀07年生咗囝囝Ryan之後，一家三口樂也融融，噚日克勤同馮仁昭報喜，佢老婆又有咗三個幾月喇，克勤又開心又擔心，因為佢愛妻心切，擔心老婆俾狗仔隊跟呀，佢噚日喺電話度講：「佢粗身大細，我驚佢俾人撞親，希望大家離佢遠啲影相，唔好嚇親佢。其實呢件係開心事，我想一次過同大家宣佈，之前唔講因為BB未夠三個月大，費事小器嘛，我之前只係同屋企人講，除咗譚詠麟。」克勤話好多謝校長保守秘密，佢知道另外有個朋友從某個渠道知道後，走漏風聲，搞到啲狗仔隊鬼咁唔得閒，呢幾日天寒地凍都喺佢屋企等，克勤話：「我以後每兩個月同大家報告一次，唔該唔好等我哋啦。」佢又話要向一啲朋友講唔好意思，因為之前以病為由推晒朋友約會，其實係老婆要安胎，希望大家明白佢苦心啦。
阿倫勸生夠四個
家BB未知係仔定女，但無論乜性別，克勤都好開心，佢話哥哥Ryan一樣咁開心。又做爸爸，克勤有四字真言：「努力搵食」，佢話：「家庭負擔好重o架，我月尾出碟，大家買多幾張支持吓，再買埋左麟右李DVD，減輕吓我家庭負擔啦。」而老友陳慧琳（Kelly）噚日都衷心恭喜克勤，佢喺電話度話：「好恭喜佢，希望BB平安出世，希望呢胎會生個女，咁可以湊個好字。克勤如果生女，咁佢囡囡又可以同我蝦餃仔做朋友，睇吓大家有冇發展機會。」
圈中首個得知喜訊嘅阿倫就話：「真係忍得好辛苦，好幾次講到口唇邊咁滯，要夾硬吞番落肚，有時自已諗諗吓會坐喺度笑。」佢同克勤好似親人咁，不停要鼓勵克勤繼續努力搵奶粉錢，又答應克勤話：「總之想做幾多場，我都冇所謂。如果今胎生女就湊成好字，生仔就繼續追落去，生夠四個加埋老竇咪係五人足球隊囉。」