阿甘話劇嘅劇情有啲沉悶，刺激性絕對及不上老虎活士偷情。如果老虎仔喺香港居住嘅話，報紙一定銷量大增，記者爭住追尋老虎情婦一號、二號、三號，甚至四號、五號、六號。老虎仔廿歲出頭就已經名聞天下，現在係地球上第一高爾夫球高手，只不過係三十零歲啫。老實講，咁年青，賺咁多錢，咁靚仔，話冇女人搵佢上身，幾難咯，何況老虎仔幼受美國文化薰陶，唔主動去搵一夜情先至奇。世界上好多電影明星，籃球明星，足球明星，皆是如此；染上HIV，近二十年來一直食藥，宣揚反愛滋嘅魔術手莊遜，喺未退役之前，就講過打波之時，東征西討，屢屢碰上靚女拍門（拍酒店房間房門）啦，米高佐敦亦係一樣。
既然如此，活士婚外攪嘢（並非婚外情，只係鍾意偷食野花啫），在視濫交若等閒嘅美國竟然如此轟動，實在令人意外。三藩市市長與佢嘅競選經理嘅太太上床，經理以「爆內幕」為威脅，立即被炒，於是公開其事，點知市長嘅民望完全不受影響；洛杉磯市長與電視台記者/主播攪嘢，有其一，再有其二（又係女記噃），事情曝光後，一樣安坐市長寶座。美國有此風氣，活士叫做醜完一陣之後，咪一樣冇事，最多離婚賠錢，佢賠得起有餘啦，同美國人講道德喎，直情諷刺性十足。
打高爾夫球不論輸贏，都可以攞出場費三百萬美元，實在匪夷所思，只有活士做得到。婚外偷食會唔會影響佢嘅經濟價值？我哋幾位男士在茶室有排拗，餐飲Ｌ話：「足球係大眾化工人階級運動，故此大明星Ｃ朗可以公然與Paris調情，可以在酒廊左擁右抱，身價仍然咁高，但高爾夫球係比較貴族化運動，打高球人士嘅形象係高檔啲，taste高啲，形象正經啲，大明星活士咁攪法，係自貶身價o架！」餐飲Ｌ有冇理由呀？高爾夫球員係gentleman，足球員係labourer？十九世紀至上世紀六十年代或者係咁，但現在已是二十一世紀，所有體育明星都係賺錢機器啫，左丁山唔信再有甚麼階級形象之分。打高球如今反而係風流公子之形象工程，活士以後更加係佢哋嘅偶像。