劉德華俾本報踢爆喺美國賭城同大馬女友朱麗倩秘密註冊結婚後，Fans有被騙感覺，華仔事業陷好大危機，為咗轉轉運，佢聽風水師建議，出年會同老婆搬出舊居，兩個人會搬去加多利山道一間價值億元嘅獨立屋居住，換一個新環境，希望有新氣象，除咗住處外，佢公司都會搬新寫字樓。
新地方望除衰氣
家華仔係租用觀塘嘅寫字樓，但年年係咁俾人加租，佢諗諗吓，覺得好唔抵，索性自己買個單位做寫字樓，最近佢喺九龍灣某工業大廈睇啱一個兩萬呎嘅單位，用咗過千萬買入，準備出年用嚟做新寫字樓，希望可以洗晒今年嘅衰氣啦！
另外，東亞運動會前晚喺維港水上舞台正式揭開序幕，華仔係表演嘉賓之一，佢同50名模特兒共舞獻唱《如果有一天》。完騷後因人多擠塞，警方為安全計，要等人潮散先畀眾星離開，結果一等兩小時。
華仔回家後即急不及待更新網誌上載維港相片同fans分享，並恭賀為香港贏得東亞運第一金的單車好手王史提芬。