煲呔誓言，香港要發展六大產業，但講到最受中央同特區政府重視嘅，相信依然都係地產業，否則國務委員劉延東噚日朝早接見特區政商界人士時，都唔會咁罕有咁一次過見晒香港四大地產商，包括長實嘅李嘉誠、恒地四叔、新地郭老太同新世界彤叔；幾大地產商仲帶埋第二代「覲見」劉延東，含住金鎖匙出世嘅第二代果然零舍不同。
懶理「官商勾結」嘅罪名幾咁嚴重，劉延東噚日朝喺下榻酒店同全國政協副主席董建華同董太共晉早餐後，旋即接見特區四大地產商，超人李嘉誠帶長子李澤鉅出席、四叔李兆基就有囝囝李家誠陪伴，鄭裕彤就同埋個仔鄭家純出席，至於新地就由主席郭老太鄺兆卿帶住兩個仔郭炳江、郭炳聯到場，但作為政協常委嘅大Ｋ郭炳湘就唔見影，好可惜郭家仲未全家總動員出場。
地產商一家兩代出席
近排特區政府出晒口，叫班大地主喺樓盤面積、樓層數目同數字買賣上唔好玩嘢、造假。劉延東擅長統戰，斷估唔會幫煲呔訓示地產商。相反，四大地產商一家兩代咁，得到副總理級嘅國務委員接見，淨係顯示佢哋喺中央心目中份量十足，已經係有錢都買唔到嘅身份象徵。
呢頭見完「財」力無限嘅地產商，轉過頭劉延東就拜會「才」華超凡嘅國學大師饒宗頤。劉延東一見到92歲嘅饒老就非常熱情咁代總理溫家寶轉達問候；獲溫總問候嘅饒老即時話唔敢當，感謝溫總一直掛住佢。劉延東期間都大讚「南饒（宗頤）北季（羡林）」博學多才，仲形容饒老好似國寶熊貓咁珍貴，得饒老好歡喜。
探饒宗頤獲贈荷花圖
探人冇理由兩手空空，劉延東向饒老送咗一尊老子像做見面禮，祝願佢健康長壽；饒老則回贈三部個人著作同一幅親筆繪嘅荷花圖，令劉延東都滿載而歸。雖然劉延東訪港行程密麻麻，可惜繼續阿爺慣常做法，唔同泛民接觸，早排中聯辦大講「對話比對抗好」，睇嚟都係叫泛民唔好咁多聲氣，唔代表中央想同泛民對話。
mailto:[email protected]