據講，日本串燒店bar頭位置，永遠人頭湧湧最擠迫，點解？原來師傅會不時送上雞肉、牛、海蝦等串燒，係呀，免費「送」呀，加埋大口大口冰凍生啤，free到爽！
記者：梁美甜
攝影：譚盈傑、梁細權
Model：Ruby
尖嘴新蒲點自家起雞皮燒蝦
位於尖嘴厚福街的大門橫丁分店，上月中正式開張，bar頭由當初無人坐到要爭凳仔，如此受歡迎，全因串燒師傅會不時送上熱辣辣指定串燒，由大路的雞肉串到特色雞皮海蝦串都有，六點後食客入到店，只要買杯飲品，由最平的$10支汽水、到$28（小）或$36（大）杯Asahi啤酒，霸到bar枱位置，就會免費請你吃串燒（鹽燒雞皮大虎蝦除外）。老闆仲建議買$12杯蜂蜜綠茶或桂花蜜，配串燒最潤喉。坐成晚都得，夠豪爽！
未霸到bar枱位，食串燒一樣唔算貴，小店串燒有三十多款，大都十零廿塊錢一客，一客一串，當中幾款每日限定串燒，鹽燒雞皮大虎蝦、串燒煙肉脆心及串燒雞腎都是推介。虎蝦是活海蝦，以自家起出的雞皮捲住燒成，簡單地以海鹽調味，雞皮香脆惹味，蝦肉鮮甜爽口又多汁，每日限賣約十多客，由於是當天新鮮貨，海蝦大細有別，會因應大細而定價，由$48-$68不等。
串燒煙肉脆心$18、Asahi啤酒$36/大杯
脆心即當造芥蘭取中心莖部，去皮只留最嫩水份最多的中心位，以煙肉包住燒，外脆內軟，汁多鮮甜。
燒日本雞皮蝦仔$10/串
蝦仔是每日新鮮由市場返的基圍蝦，以雞皮捲住燒。雞皮甘香蝦肉爽，抵吃！
最平$8串的汁燒雞肉、冬菇和$12串的鵪鶉蛋，都是熱賣口味。
左起：雞腎$18、煙肉脆心$18、鹽燒雞皮大虎蝦$48-$68/串
雞腎較一般嚐到的細很多，原因是用上新鮮雞腎，吃得出鮮味，貨源有限，每日限十多串。雞皮燒海蝦，蝦又大隻又甜。
芝士牛油燒薯仔$15
日本薯仔先烚過，以牛油燒香再加入自家調製的芝士汁，薯仔軟腍甜美。
大門橫丁（23944335）
尖沙嘴厚福街10號地舖
蘇豪消夜$15串紫蘇雞
中環蘇豪Taku開業四個月，店舖設計精緻舒適，看位置及門面，心想消費定必不便宜，殊不知，小店於本月12日起，逢周五、六晚上10時半至深宵推出Asahi消夜串燒吧，所有串燒一律$30一客，一客兩串，平均只售$15，中環型店、旺角價錢。師傅為配合生啤清爽口感，特意創製出三款新口味，牛肋肉串燒、煙肉車厘茄串燒和茄子串燒。BTW，於Taku食消夜串燒更有機會贏取日本雙人賞櫻花之旅，兼參觀由著名設計師PhilippeStarck設計的Asahi啤酒廠總部。飲飽食醉之後，碰吓運氣囉！
紫蘇雞串$30/兩串
如香腸般的紫蘇雞串是將雞髀肉攪碎，加入新鮮紫蘇及調味後以保鮮紙定型，落單後再串燒上桌，紫蘇味道偏濃，下酒一流。
上至下：牛肋肉、茄子、煙肉車厘茄各$30/兩串
牛肋肉以醃料醃過再燒，由於有少少筋及軟骨，肉汁豐富具咬口。茄子肉汁飽滿。煙肉夾車厘茄，香甜不膩。
豆腐串燒$30/兩串
店舖賣點之一是以有機黃豆自家製豆腐。豆腐先炸後燒再掃醬汁，外脆內滑，豆味濃郁。
Taku（25459966）
中環伊利近街35號
旺角園景$24醬燒岩蠔
市區少有園林戶外串燒店，位於旺角的趣屋，其戶外花園新近開闢成串燒吧，開張一個月試業期間惠顧更有七折優惠（至本月20日止）。自問愛開揚戶外環境用餐，與同儕邊嚐熱辣辣香噴噴的串燒、邊開懷暢飲，絕對是樂事！串燒由十零塊錢一串起，算抵食！推介珍寶燒雞皮海蝦，蝦夠大隻，雞皮燒得甘香。招牌醬燒岩蠔，採用日本廣島蠔，肉厚肥美，加入日本大葱及自家調製醬汁，惹味香甜，趁熱食，滿口鮮甜，超滿足！
醬燒岩蠔$48/兩隻
岩蠔燒後蠔香異常吸引，配以麪豉、麻醬、橄欖油等調製的醬汁creamy惹味，與清酒、生啤都搭配。
珍寶燒雞皮海蝦$55/隻、牛肋骨$24/串
每日限定12份的燒海蝦超大隻，加入日本大葱以雞皮捲住燒，雞皮脆，蝦身得雞油滋潤，口感豐腴。牛肋骨帶筋、骨，咬落口感豐富。
荔枝豬肉卷$22/串
以豬腩肉捲住荔枝燒成，肉香富口感，荔枝香甜又多汁，配搭得宜。
女青年會趣屋餐廳（27113157）
何文田文福道5號地下