擁有44吋長腿的呂慧儀早前憑高人一等的身材，打敗一眾o靚模接拍瘦身沐浴露，賺取六位數字酬勞。胸可以僭建，長腿冇得裝，呂慧儀也自知優勝之處，直言：「啲o靚模高度參差，有啲嬌滴滴好可愛，我高頭大馬，好難同佢哋比較。」暗寸一眾o靚模細粒兼腿短。
長腳蟹呂慧儀早前接拍瘦身沐浴露廣告，收取六位數字酬勞，自然搏到盡，性感演出在所不計，她穿着比堅尼上衣及超短褲，不停擺出各種姿勢，大騷44吋長腿及S形身材。後來她又換上tubetop上衣橫躺在鋪上大毛巾的地上，煞是誘人。
化妝師墊高服侍
近年廣告市場幾乎是o靚模天下，呂慧儀今次全憑44吋長腿打敗一眾o靚模而獲青睞，廣告商還大讚她道：「露長腿邊個夠呂慧儀揮？胸可以僭建，長腿冇得裝冇得扮，44吋長腿真係真材實料。」由於呂慧儀穿上高跟鞋工作，化妝師及髮型師要自備木箱才可配合這位高人一等的高妹呢！
呂慧儀對備受讚賞開心不已，並說：「早排有個星期氣溫下降，咁蹺我有事要將拍攝日期延遲一星期，點知到拍時天氣回暖，着少啲都唔怕。」卒之當天拍了6小時便可收工，談到長腿比一眾o靚模優勝？她也坦白：「好多o靚模都好靚，身形好fit，但高度參差咗啲，有啲嬌滴滴，咁都好可愛嘅，我自己屬於高頭大馬型，好難同佢哋比較。」言下之意似揶揄身材全是細細粒的o靚模們長腿欠奉。
愛冲凉自我按摩
至於瘦身之道，呂慧儀不只以冲凉來減肥，她說：「無論幾攰，冲凉時自已按摩一下，消除疲勞，幫助通淋巴，身形又fit又結實，所以我好鍾意冲凉！」
撰文：丁寧