年初曾為財政預算案宣傳絞盡腦汁嘅鬍鬚曾，係時候要為出年2月24日發表嘅新一份預算案度橋。佢較早前為呢份預算案拍咗套30秒短片，今日正式出街，短片主角嘅鬍鬚曾噚日喺網誌上大賣關子，唔肯透露短片有乜賣點，但就話一定令大家耳目一新。
套短片喺兩星期前嘅星期日拍攝，鬍鬚曾話當日同攝製隊由朝早做到夜晚8點幾，其間去咗三個景點，同時亦換咗三個妝，一時吸面油，一時補粉，其間又要背對白，真係忙得交關。而且導演非常嚴格，有啲情節NG不下十幾次，堪稱新一代NG王。鬍鬚曾咁落力演出，無非是希望市民踴躍表達意見，佢強調一定唔做「假諮詢」，市民只要肯講，佢一定肯聽喎。