市況又再想挑戰高位，呢輪塗上迷彩嘅輪到一眾內房股，問題係，30幾隻內房股點揀呢？我冇水晶球，講唔到邊隻幾時升幾時跌，但揀股從來都係先從基本因素入手，即使股價唔就，坐艇都有覺好瞓。
一般市場愛看內房股嘅土地儲備面積同NAV去睇係咪抵買，但往往忽略發展位置同物業特色，到底係單一城市集中發展好，還是全國都有靚盤好？有分析認為，內地搞房地產最重要係同政府保持良好關係，攞地、拆遷、補地價時至「易話為」，所以喺單一地區發展嘅就盡享呢個優勢，好似上海復地（2337）、湯臣集團（258）、中渝置地（1224）及富力地產（2777）就係好例子。不過，點解呢幾隻嘅股價唔見得特別標青？
土儲散佈多市有着數
其實隨住內地房地產泡沫越發越大，政策風險亦與日俱增，終有一日會有調控或收緊銀根措施，將對單一地區發展嘅發展商帶來較大打擊，到時中央甚至可能會因應個別市場嘅炒風，「度身訂做」一系列打壓措施。
現時物業最分散嘅要數龍頭中國海外（688）、世茂房地產（813）同恒大地產（3333），中國海外同世茂分別喺20同24個主要城市都有項目，土儲樓面面積分別達2563萬及2620萬平方米。廣州起家嘅恒大，覆蓋城市更多達24個，正發展項目54個，土儲建築面積高達5120萬平方米，土儲成本平均每平方米445元人民幣。
未來5年，內地大部份重點城市都會受惠四縱四橫嘅高鐵計劃，形成5至8小時嘅大型經濟圈，好多以往嘅不毛之地，隨住城鎮化發展變得遍地黃金。
所以物業發展重點唔再局限於一個城市甚或一個省分，而以經濟區域劃分，長三角、珠三角已發展多年，環渤海、中國新能源「矽谷」江蘇、海南度假天堂、東北三省、大西北資源等發展概念多的是。冇番咁上下土儲，點食到中央遍地開花嘅政策取向。
至於乜嘢發展模式最有利可圖？明天再談。
胡孟青