FinalFantasyXIII 史上最靚 慢工細貨RPG

FinalFantasyXIII 史上最靚 慢工細貨RPG

差唔多由PS3公佈開始,就話要出《FinalFantasyXIII》!終於要到今個月17號先話正式推出;呢隻要玩家們等咗幾年嘅RPG大作,你話唔期待都幾難,正所謂慢工出細貨,配合PS3機能,畫面細緻度又確實可稱得上精雕細琢,聖誕推晒約會都係為佢咋!

記者:許福合

實時戰鬥

《FFXIII》畫面有幾靚,真係有眼睇,唔使多講,比較着眼之處係今集使用一個特別嘅實時戰鬥系統,當玩家們考慮如何出招之時,仲要注意時間,畫面有一個計時器,並且會將時間值分成4個等級,當時間值滿咗之後,角色就可使用多個指令攻擊,同時為咗無悶場,當要對付卒仔時,毋須苦等,可以選擇立即攻擊。

■女主角Lighting,設定成沉默寡言,但打起時就人如其名。

■唯美嘅畫風,當然係FF不能缺少嘅元素。

■遇到敵人攻擊時,座騎Chocobo不會自動反擊,留心!

角色成長

玩得RPG梗係想將角色變強,《FFXIII》角色成長系統其實同《FFX》有啲相似,不過今次改為用水晶石(透過戰鬥獲得水晶點數),可以按路線取得的能力並強化角色嘅水晶;暫時所見有物理攻擊、魔法攻擊及體力強化水晶,另外亦有特殊能力嘅水晶,玩家要考慮就係因應組合內容不同,分工來選擇強化嘅優先順序,令到戰鬥時有最佳效果。除咗角色可以強化外,連武器同裝飾品都可升呢!利用遊戲收集而來的材料,可以提升物品嘅經驗值,達標之後就可進行強化,不過留意係竟然會有減經驗值嘅材料,所以咪亂用。

■武器改造後,形狀都有所變動。

■採用水晶石成長系統,收集水晶提升角色成長。

■還可選擇角色成長方向。

FFXIII特別版PS3主機

今次出《FFXIII》,更會配合一部特別版陶瓷白PS3主機推出,上面印有《FFXIII》主角Lighting圖樣,其功能與之前推出嘅薄版PS3差唔多,不過硬碟就會用250GB,而手掣亦會夾番用陶瓷白。售價方面,PS3版《FFXIII》售價為$649,而《FFXIII》版PS3套裝就要$3,248,計落條數都算合理,未有PS3嘅玩家可以考慮。

幻想之壘試玩FFXIII

想搶先試玩FFXIII亦有計,PS3FINALFANTASYXIII幻想之壘將會於12月11日至17日進駐銅鑼灣鬧市,機迷可以親身試玩FFXIII,同場仲會舉行FFCOSPLAY大募集,入圍仲有機會參加AGS2009嘅COSPLAY大賽。

日期:2009年12月11日至17日
時間:10am-10pm
地點:銅鑼灣怡和街1-1L號香港大廈地下A1舖(SOGO旁)

Profile

開發:SQUAREENIX
主機:PS3/XBOX360
類型:RPG
推出日期:12月17日
遊戲人數:1人