黎諾懿昨日與米雪及李國麟等藝員，聯同家人到奧海城為無綫兒童台聖誕新節目宣傳。在今屆電視頒獎禮奪得我最喜愛的電視女角色及最佳表現大獎的楊怡，早前被發現與黎諾懿攬頭攬頸，態度親熱，黎諾懿例牌否認緋聞，他說：「我哋係好好朋友，識咗5年，係女仔同我都有發展機會。」
讚演技有目共睹
對於楊怡被網民批評演技未夠班，黎諾懿不避嫌力撐：「唔可能全世界都係你嘅fans，總會有人係其他人嘅fans，今年楊怡表現有目共睹，佢喺家好（《溏心風暴之家好月圓》）嘅演技已經被肯定，佢係好穩陣出色嘅演員，今年唔畀佢，畀邊個？」黎諾懿指演技高低，沒有準則，不擔心楊怡被無綫力捧反而累了她。
採訪、攝影：張俊銘