舊書值錢，只因回憶有價，之所以原本賣幾毫子、幾蚊雞嘅小書、雜誌，事隔幾十年發黃發霉反而升值幾十倍、幾百倍。幾個月前首次舉行舊書字畫拍賣會嘅新亞圖書中心今日再添食，上次意外咁多人捧場，丁方幾百呎嘅地方塞爆人，競投者要企到出後樓梯，幾部老爺冷氣出「行」力都冇用，人逼人幾乎中暑，新亞負責人蘇賡哲話今次唔怕焗到暈，因為今日嘅拍賣會移師旺角好望角大廈教協會議室，有冷氣嘆。
有國民革命軍鳴謝信
今次拍賣焦點，蘇賡哲話相信係張愛玲親筆信，內容有關出版事宜，下款有簽名，共有75字，蘇賡哲稱由於罕有拍賣張愛玲手稿或信件，所以好多張迷有興趣競投，北京、上海都有買家躍躍欲試，故雖然底價僅1,500蚊，但相信成交價會逾萬元。
另一名家倪匡一份散文手稿都會拍賣，蘇賡哲指全長約500字，稿紙有倪匡印章，應該出於八十年代，底價500蚊，佢問過倪匡值幾錢，倪匡話市價大約4,000蚊。除咗呢啲著名作家手稿，蘇賡哲話今次有新拍賣品，就係一啲清人線裝手稿，呢啲作品無咁大眾化，底價幾百蚊起，識貨之人可能搵到心頭好。
另一啲較特別嘅拍賣品，應該係國民革命第十九路軍鳴謝信，蘇賡哲指當年海外華僑捐錢畀孤軍作戰嘅十九路軍，軍方回信致謝，好有歷史價值。清人手稿、歷史文物可能係小眾興趣，因此拍賣焦點都應該係普及書刊，金庸舊小說向來有價有市，今日多套舊金庸小說拍賣，其中一套28冊武史出版社嘅《神鵰俠侶》底價5,000蚊，唔知最終幾錢成交？
得意書刊《性慾誌異》
八方睇完拍賣目錄，發現都有啲得意書刊，其中陳榮著作《入廚叁拾年》一套14冊，78年出版，應該係早幾代嘅烹飪天書；另有《性慾誌異》、《寡婦自記》，睇書名足以引起好多想像；日本二玄社《書迹名品叢刊》，共22集、208冊，底價30,000蚊全場最高。
mailto:[email protected]