超豪《建國大業》　68分鐘英雄逐個數

以百位影視巨星作號召嘅《建國大業》，終於推出影碟版！最吸引各位目光嘅，應該係超豪華禮盒裝珍藏版，唔單止內附全彩色印製相冊，仲送原子筆、筆記簿、水晶紙鎮以及MousePad，總重量達到2kg！夾埋Bonus粒幾鐘歷史人物介紹篇，實行來個集體回顧。

記者：陳國輝

古典包裝好Feel

除例牌推出VCD同埋DVD之外，估唔到連Blu-ray都有份！不過，睇高清版毛主席同蔣介石，以及欣賞槍林彈雨嘅聲效，應該都唔係《建國大業》想表達嘅重點；睇人物、學歷史，緬懷六十年前中共建國嘅艱辛歷程，可能比「睇星」更有賣點。特別一提係限量3,000套嘅3DVD珍藏版，由硬皮紙物料製作，包裝上更設計到仿似經典書籍般，都幾講究；打開入面再睇，有金黃色絨布鋪上面，感覺豪華，據講FullSet接近2kg重量，拎得耐真係好辛苦o架，不如擺上書架做裝飾好過啦！

■限量珍藏版包括3隻DVD、相冊、MousePad、原子筆、水晶紙鎮以及筆記簿。

■相冊採用粉紙印刷，真係估唔到咁靚，入面仲列出角色人名表。

翻睇54建國英雄

可能會諗，珍藏版點解會有3隻DVD咁多？實情電影只佔咗一隻，另一隻係BonusFeature，包括預告片、建國日誌同埋建國MV，都係製作特輯等例牌菜，個人認為不看也罷，但係第三隻就真係要向大家講，因為內容係54名建國英雄嘅介紹，全片長度達到68分鐘，剪輯包括電影內嘅劇情，仲有真實歷史片段，入戲院都睇唔到o架！當然，唔係每一個人物都叫人有興趣，故此，呢隻碟特別加插以人名作排列嘅目錄選單，想睇邊一位，直接㩒入去就得，果然夠晒體貼。