渝港國際（613）唔聲唔聲，貼近兩個月橫行頂，買入等爆邊。渝港揸住中渝置地（1224）2.54億股或9.9%，但咪睇呢兩億股少嘢，以中渝最新收市價4.02元計數，渝港應佔權益等值高達10億銀，相當於渝港每股0.11元，高過渝港現價0.106元。
仲要咁睇，齋計由上年尾到家陣，因為中渝股價升值，已經為渝港額外增值5.2億銀。中渝主打嘅內房業好景，隨住股價中線一步步反映業務及NAV增長，渝港家底亦一樣可以水漲船高。又中渝上星期三，成交額上到4億銀過外，係4個月以嚟高位。中渝有異動，渝港亦一樣有同氣連枝概念。呢轉博渝港爆邊，目標翻半番到0.159元，渝港相對今年6月底時NAV0.316元嘅折讓，仲貼近50%，實情仲有大把空間炒折讓。
精電有point炒復蘇
精電（710）最新NAV4.40元，現價2.75元折讓37.5%，NAV折讓過關。又呢期所見，中資汽車股升完再升，再創1年新高。精電唔係汽車股，但主打瓣數，包括產銷及供應祖國汽車顯示屏。祖國汽車業好景，周邊配套行業都可以受惠，精電掹車邊可炒汽車sector，兼有point炒復蘇。呢轉短打，博精電衝穿1年高位3.05元，上望3.30元，目標價未有耐上到NAV。
錢雋