夠Car事：澳門自駕遊　$10泊5小時盡情玩

以前遊澳門，最方便嘅交通工具係搭的士，但家的士越嚟越難截，搭巴士更加逼到爆，想玩Feel啲，不如自己揸車！其實澳門交通規則與香港相距不遠，加上指示清晰泊車容易，想去何地方，絕對話咁易。聖誕假期又快到，有無興趣嚟次澳門自駕遊？今日先為大家介紹兩條風味不同嘅路線，實行玩盡澳門。

記者：趙慧敏
攝影：陳盛臣
鳴謝：AVISMacau（853）28336789

TrackOne　跑賽道車手上身

友誼大馬路→加思欄馬路（葡京彎）→海邊馬路→馬交石炮台馬路（髮夾彎）→漁翁街（漁翁彎）→友誼大馬路

澳門格蘭披治賽車結束不久，大家對葡京彎、髮夾彎等地方嘅印象依然深刻，走一趟賽車路線，試試身手之餘，又可沿途觀賞名勝。整個賽道只長6.2公里，碼頭對出嘅友誼大馬路為起步點，走勻葡京彎、髮夾彎及漁翁彎等，最後折返友誼大馬路，一圈所花時間不足十分鐘。齋揸車太單調？其實沿賽道亦有名勝，畀機會大家影吓相。首先經葡京彎入加思欄馬路不久，可留意左邊，沿東望洋斜巷可到東望洋塔，該處可眺望整個澳門半島，景色一流。離開東望洋繼續前行，就到松山公園，呢度可乘搭纜車觀光。

TrackTwo　氹仔路環玩半日

友誼大橋/西灣大橋→官也街→龍環葡韻→路環→民國大馬路→黑沙灣

要睇發展神速嘅澳門，一定要去氹仔及路環走一趟。澳門有三條大橋往氹仔，包括靠近碼頭嘅友誼大橋，舊葡京酒店對出嘅嘉樂庇總督大橋及西灣大橋，其中嘉樂庇總督大橋只准公共交通工具及指定車輛行駛，自己揸車，就千祈咪行錯。無論經友誼大橋或西灣大橋，過橋後便會睇到清晰指示教大家到氹仔市中心官也街，買手信同開餐都可以喺呢度。觀光點一樣有，由官地街後嘅告利雅施利華街左轉，直上嘉路士米耶馬路，就係出名嘅龍環葡韻葡式大宅及嘉模聖母教堂，又係拍拖影靚相嘅勝地。離開官也街，除了可以到附近酒店及賭場、俗稱金光大道嘅路氹連貫公路外，亦還可向路環方向繼續前行，到達路環市中心，「朝聖地」當然是澳門安德魯餅店。食完出名嘅葡撻，可走到民國大馬路走一圈，其中聖方濟各教堂值得一看。如果有時間，還可以去黑沙灣嘅葡國餐廳法蘭度餐廳飲番杯。

租車貼士

在澳門租車揸，其實好方便，只要出示香港駕駛執照便可，毋須申請國際駕駛執照，車種選擇夠晒多。至於租車價，一般由$599-$1,400，假日部份車種會加收$100至$200，而最具規模嘅有AVISMacau、宏益及百路達。AVISMacau正提供租車優惠，大家可上網睇吓邊個時段最抵。

http://www.avis.com.mo/index_tw.php（AVISMacau）

錶位半小時$1

香港街錶位最長時間只是兩小時，車主見到澳門嘅咪錶真係開心死，事關澳門街錶分為兩大類，灰色柱係五小時錶位，黃色柱係兩小時錶位，而且價錢極平，半小時只需$1。至於公眾停車場，一般時租是$3。至於住喺酒店，要泊車又點算？澳門大部份酒店會讓住客泊車，至於無此優惠嘅酒店，車位時租大約十多元。

牛肉乾盛惠$600

澳門酒店越開越多，交通流量增多自然管制多，以往座駕隨街泊嘅年代已經過去，尤其繁忙地方，警察抄牌絕不手軟，不過原來澳門除了抄牌外，若再被發現仍未將車駛走，就會鎖車，攞車就要先交罰款才解鎖，麻煩到極。另一樣要注意係澳門交通罰款額較香港高，每張牛肉乾盛惠$600，不過如果在15日內繳付，可獲豁免三分一罰金。