甘威炒女助理搞到一身蟻，星期三就面臨立法會譴責動議，王麗珠公開陳情書，力指甘威死纏爛打真係送佢一程，八方聽聞甘威唔想一味捱打，思前想後有意反擊，想公開兩人交往詳情，甚至一啲王麗珠向佢講述感情嘅短訊，不過被白鴿黨大佬力阻，恐防貿然出招，令人覺得女主角遭抹黑反惹起公憤，屆時變成「周街唱」賤男仲難收科，所以㩒到佢實一實。
警告信以證工作表現
八方收到風，甘威有保留王麗珠傳畀佢嘅手機短訊，內容唔止講公事，仲有涉及私人感情問題，當時女主角對甘威冇表示反感迹象，如果呢啲短訊公開，王麗珠喺陳情書入面話只視甘威係上司嘅講法，分分鐘受到挑戰。
由於立法會極有可能調查甘威，所以佢已準備好相關資料以便接受盤問，文件包括畀王麗珠嘅警告信，以證明其工作表現並不穩定，至於「戲肉」，則涉及王小姐個人感情生活煩惱，甘威給予適當關心，應該係好僱主先啱。