聶風和步驚雲在《風雲》故事內聯手對抗武功高強的絕無神，曾經牽動不少漫畫迷的心。故事外，電影鬧雙胞胎，劉偉強的《風雲無名再現》仍未見影，但彭氏兄弟的《風雲Ⅱ》日內便上映。不過先下手未必為強，改編電影贏票房輸口碑屢見不鮮，更慘是兩者皆輸，憑鬼片冒起、初拍古裝動作片的彭氏兄弟意外在一頓蛇宴上得老闆首肯，拿着1億成本玩足3年玩得開心盡興，如今電影上映正是他們還債的時候。
靠「鬼」起家的彭氏兄弟，3年前丟低老本行，出人意料地拍起改編自馬榮成漫畫的《風雲Ⅱ》，耗資1億由籌備到拍攝用足3年時間。他們笑說緣起自一頓深圳蛇宴，細佬彭發說：「我哋兩兄弟唔係淨拍鬼片，呢啲係大家嘅錯覺，彭氏兄弟題材都好多元化。3年前有次同老闆（林小明）去深圳食蛇，諗住講新劇本，係一個古裝武打故事，所有人物都係原創，連特技都諗好點做。不過老闆話彭氏兄弟雖然拍古裝唔係問題，武打都唔係問題，但係咁大製作拍《風雲》呢類漫畫改編會保險啲喎。」
「真係食粥食飯睇今次」
坐言起行，席間林小明即時打電話聯絡馬榮成、鄭伊健和郭富城，一下子便得到各人首肯。雖然原方案被否決，大佬彭順的想法跟細佬一樣：去馬！他說：「梗係第一時間應承啦，成億畀你拍3年，利息都唔少啦。而且唔係冇風險喎，講真彭氏兄弟真係未拍過武打片喎，既然有老細畀錢我哋兩兄弟玩嘢，我哋梗係冇問題。」
籌備經年拍攝一載，電影即將上映，一向嬉皮笑臉的彭氏兄弟也開始緊張，大佬說：「由《無聲火》到家《風雲Ⅱ》，係我哋兄弟入行10年嘅作品，我都想睇吓磨咗咁多年劍嘅成果係點，真係食粥食飯睇今次。」
從來改編電影最難過的一關，便是原著的fans是否接受，特別《風雲》迷大多從小看着該漫畫長大，稍有異樣必定難逃法眼，但細佬卻豪氣地說：「之前好多其他漫畫迷睇完啲改編電影之後都會喊打，不過呢啲壓力會變成我哋嘅動力，野心係想佢哋睇完之後會話：『嗱，呢啲咪就係漫畫轉電影囉』，目標係佢哋唔happy唔收貨。」
其實細佬彭發10年前已跟改編自馬sir作品的電影《中華英雄》結緣，該片有一幕戲應該有看過的fans均畢生難忘：一個遠景闊角度，明月當空，鄭伊健飾演已退隱江湖的華英雄，站在中華樓頂孤芳自賞，低吟一聲後，整個人即「嗖」一聲飛向月亮，消失得無影無蹤。當年爆滿的午夜場觀眾即時爆出比看喜劇還開心的笑聲，這個經典場面在上映第一天後即被剪走，不過有看過的人，每次提起仍不免起哄一番。
剪片受牽連誓雪前恥
彭發對此更是刻骨鉻心，自爆正是當年電影剪片師的他無奈地說：「剪嘅時候個場面淨係得個大月光同屋頂，其他都係後來用特技加上去。啲人一提起《中華英雄》就會講起呢一幕，不過又真係幾好笑嘅。」他語帶不平的說：「你話做導演幾慘，你拍一場好戲都未必有人講10年，你衰一次就次次講起都俾人笑，仲笑足10年，雖然唔係我拍，有份剪都覺得面懵。今朝同伊健傾開，佢自己都笑埋一份，所以今次在公在私都好，算係洗底之作。」
場地提供：九如坊蘭桂坊酒店
上映日期：12月10日
土法煉鋼VS閉門造車
10年前的《風雲雄霸天下》到今日的《風雲II》，導演由劉偉強換上彭氏兄弟，但男主角仍然是鄭伊健和郭富城。事隔10年，風雲再現，演聶風的鄭伊健形容當年拍《風雲雄霸天下》是搵命博之作。
伊健說：「劉偉強嘅風格唔同，佢諗到就做，去到四川，化完妝佢話『行嘞』，啲人就着住戲服、揹住器材行上樂山大佛開工，天氣又熱，山路又難行，大家真係搵命博，但係嗰時大家一條心，始終係第一部大型特技片，又係第一次將《風雲》拍成電影，係辛苦o架。今次始終係10年後，科技都唔同。」他指《風雲II》籌備時間較長，每一場景都有故事圖配合，與早年由開拍到完成只得一年時間不可同日而語。
駁膠髮生頭瘡
郭富城也同意彭氏兄弟的製作有系統得多，他說：「話晒都10年光景，而且今次投資大咁多，自然特別小心。」他形容拍《風雲II》堪稱不見天日：「全部廠景，對住塊綠色布幕做戲。不過我覺得自己身形仲fit過當年，更加適合演步驚雲。」
新舊作的造型其實分別不大，因為同樣跟足馬榮成的原創，阿城最慶幸的，是今次不用再駁上藍色頭髮，他笑說：「嗰時個藍髮係膠做嘅，駁咗之後要喺大熱天氣之下打，一打就十幾個鐘，最終搞到成頭都係頭瘡，醫咗一段時間。」至於兩片最大的分別，阿城認為是心態，如今已貴為兩屆金馬影帝的他如是說：「當時仲係用一個歌手嘅心態去演戲，家就真真正正覺得自己係演員。」
導演推介
《風雲Ⅱ》耗資1億，籌備及拍攝3年，導演彭氏兄弟落足心機拍好戲，電腦特技更要求做到最好，以下是他們推介的4個不可不睇場面。
無名先聲奪人
「千祈唔好遲入場，因為一開場何家勁飾演嘅無名就會出現，呢個場面好似人哋結局嗰場咁精采，因為佢會施展萬劍歸宗，漫畫迷都知呢招威力有幾大。」
步驚雲顯功架
「戲中嘅場景你唔會喺現實中搵到，因為全部都係特技做出嚟，中段郭富城演嘅步驚雲會施展『云十』（音霸，馬榮成自創字，意即雲非雲劍非劍）劍法，電影裏面會用唔同效果同音效配合唔同劍招，因為我哋唔可以好似漫畫咁寫個招式名出嚟，每一招嘅特技效果都好勁，必睇。」
靚絕風雲對決
「伊健提出過一個好有趣嘅問題，話睇漫畫後再睇電影就係投入唔到，因為漫畫啲人唔會郁，聶風一郁就唔好睇。所以我哋決定用慢動作拍攝手法，觀眾睇到千格菲林（每秒拍攝1000格菲林）嘅鏡頭時，會睇到動作好似靜止咗，畫面會似睇漫畫，最可以表達呢個效果係風雲心戰同埋佢哋雨中對打嗰兩場。」
打造原著場景
「因為套戲要做好多後期特技，為咗方便，幾乎全套戲都喺廠景拍攝，真係不見天日，啲演員經常要對住個綠布幕做戲，所以少啲想像力都唔得，但就保證全部佈景都係獨一無二，亦可以將原著入面創造嘅場景好真實咁呈現出嚟。」
故事大綱：聶風入魔救蒼生
《風雲Ⅱ》無神絕宮門主絕無神（任達華飾），率領兒子絕心（謝霆鋒飾）揮軍中土，使詐先後擒下皇帝（譚耀文飾）及一眾武林人士，逼其臣服，就連武林神話無名（何家勁飾）、步驚雲（郭富城飾）及聶風（鄭伊健飾）聯手對抗絕無神，也相繼敗陣受創，幸得豬王（林雪飾）將他們救離險境。
原來絕無神入侵中原是為了一個遠古的皇族墓穴──龍塚，相傳誰人得到龍塚之秘，便可號令天下，擁有掌控神州及臣服蒼生的無上權能。中原命運岌岌可危，武林存亡更是迫在眉睫，龍塚之內，步驚雲、聶風及絕無神三人再度對決，聶風為擊敗大敵竟不惜入魔提升功力……
