賓架C攞得「行政人員」（ExecutiveAward）大獎，不欲打攪客戶、同事，只係搵埋一家人、左丁山與教授S夫婦陪佢坐在一席，賓架C有女長成，大千金在銀行（唔係佢嗰間）工作，二千金係新科醫生，在公立醫院做婦產科，碰啱教授S夫婦兩人皆是醫生，S夫人仲係婦產科嘅㖭，於是二千金坐在S夫人身旁，一味請教，頗有得益。
賓架C行色匆匆，八點五十分上台攞獎，跟住影相，晚宴起菜，十點過後立即上車赴機場，直飛倫敦，佢着住成身黑色煲呔禮服，去邊度換衫呢？想嚟銀行大班必定有專人照顧，毋須擔心，只係我哋呢啲小人物如遇上同樣情況，有啲傷腦筋而已。
中場行出大堂去洗手，只見議員L在外面講緊電話，似乎係收緊料噃。人哋講電話，梗係要行快幾步啦，唔通企定定聽人講嘢咩。點知議員L揮手示意，請左丁山等一等，佢好快講完電話，對左丁山講：「喂，阿甘繼續有下文，你點睇？」有下文？唔係王小姐不願作證，不了了之喇咩？議員L話：「非也，王小姐透過律師，今日下午五點送咗一份文件到立法會，好似寫日記咁，一定會再起波瀾，民主黨已經開咗記者會回應。」哦，王小姐唔出又出，令人好生奇怪，照計件事已經淡出咗，香港人記憶好短暫嘅啫，現在大把人講政改方案，邊度仲會理會阿甘活劇吖，但王小姐突然「投彈」，令民主黨好唔得閒，建制派必定乘機再攪阿甘，況且拖埋劉慧卿、何俊仁落水，民主黨內外交困矣。
黃毓民可能係最唔爽嗰位，阿甘會搶去「五區請辭」風頭，八卦新聞會蓋過請辭之辯，點宣傳呀？最爽嗰位可能係曾特首，坐響度唔做嘢，無端端民望都會止跌回升，心情輕鬆，竟然抽得半晚閒，請媒體人士去跑馬地跑馬，余錦賢已在佢嘅專欄細述之，之後兩日又有王小姐忽然發難，或者又會推高特首民望評分！
跟住見到一位高官講起阿甘，高官話：「甘威有排煩，我諗係有高人指點，令阿甘不得安樂呀嗎？」咁多高人？民主黨不妨亦試吓搵位高人拆招。