高登網民最尊敬、朝頌晚禱嘅小丑神,噚日昂然進入莊嚴嘅立法會,震懾反普選牛鬼蛇神。浸會大學國事學會秘書長楊繼昌,噚日出席政制事務委員會特別會議狠批政府今次假諮詢,對主流民意充耳不聞,諷刺如果政府真係想吸納最多民意,何不進行街頭問卷調查,「不如搵o靚、喺街度搵旺角啲毒男、汁男、宅男,叫佢哋剔晒份問題,民意基礎仲好啦。」
楊繼昌有備而來,每當建制派團體代表發言時,就舉起小丑神標誌,一般人可能唔識小丑神,衪其實源自高登討論區表情符號小丑icon,又被稱為「膠神」,發表廢話嘅網民會俾人派「膠」,楊繼昌噚日親自派「膠」俾建制派,即係諷刺佢哋講廢話。