小妹噚日去澳門威尼斯人嘅亞洲成人博覽觀摩，雖然好多係麻甩佬，都有唔少女仔。大會話噚日人流比舊年多咗兩倍，日本AV界天后小澤瑪莉亞都有嚟，佢同幾個女優都成為全場焦點，個個男人都流晒口水，圍住佢哋狂影。小妹偶爾都會同姊妹一齊睇吓日本AV片，但當笑片睇，尤其係女優誇張嘅表情，都幾好笑，但又覺得佢哋好慘，唔知係咪被迫，但同幾位AV女優傾偈後，發現可能子非魚焉知魚之樂。
入行乃自願
25歲就做咗女優7年嘅乃亞最有女王feel，話唔少做呢行嘅都係自願，佢自己就係因為好enjoy份工，特別喺戲裏面可以扮演惡死蝦男人嘅角色：「我哋只係做自己鍾意做嘅嘢，冇傷害任何人。」佢家仲兼做埋監製添。24歲範田紗紗講起拍攝經驗仲彈咗句：「Kimochi!（舒服）」。至於當女優只一個月嘅周防雪子話屋企人之前有反對，但見到紅咗就支持佢添。
法國成人女星Katsuni都話，AV片雖由男士顧客作主導，但其實幕後工作人員包括高層都有唔少女性，唔知邊個控制邊個，「男士們，不要全相信你所看到的。」
講就咁講啫，啲女優咁好演技，邊句真邊句假佢自己先知。見到幾位女優俾現場龍友用相機閃到流眼水，真係有苦自己知。另一日本女優森下久留美仲話，女優退休後多數只有兩條路，一係結婚，一係做陪酒。亞洲成人博覽今日閉幕，有興趣咪去開吓眼界囉。
電郵：mailto:[email protected]