跑新聞，《蘋果》一向搏到盡，講到做善事，同樣唔留力。蘋果日報慈善基金為弱勢社群救急解燃眉，更加關心我哋嘅未來社會棟樑，尤其一眾貧困家庭嘅學生，所以早喺13年前，成立「蘋果助學金」，每年暑假尾至新學年頭，畀中小學生申請，今年仲推展至大學生都受惠，用意係幫經濟有困難嘅家長減輕供書教學負擔，畀學生知道社會上有唔少好心人支持佢哋。
今屆蘋果助學金撥出650萬元，超過2,000個學生受惠，打破歷年紀錄。噚日喺將軍澳匯知中學開咗個分享會，有400幾學生同家長出席，仲有蘋果基金嘅董事同贊助商；所有出席者都有禮物攞走同茶點食，難怪個個笑到合唔埋口啦！
受惠者分享感受
八方覺得搞呢個分享會好有意義，有啲學生上台講吓讀書心得同感受；噚日有個好感人嘅場面，就係自閉症學生嘅單親媽媽周女士，講到要獨力照顧兩個年幼兒子，好辛苦，慈母嘅辛酸表露無遺，睇到八方都眼濕濕。