今時今日iDTV（內置數碼廣播接收器薄屏電視）賣到成行成巿，日本東芝家先至殺入香港，推出佢哋公司嘅首部iDTV。
姍姍來遲點樣同其他品牌揮？生意人又真係有啲計，新機其中一個賣點係可以將標清嘅畫質，升級至高清，用家睇DVD或者標清嘅節目，畫質即刻升呢。
獨有智能全感系統
東芝影音及家電業務部高級主任Ian話，今次一口氣推出咗REGZASV650、ZV650、XV650三個高、中同入門級嘅機款，三款機嘅共通點係配備由東芝首創嘅超解像技術，將720×480嘅標清畫質，倍線到1080p全高清畫質，「家巿面嘅iDTV，只有東芝有呢個倍線功能，不但唔使靠DVD播放機倍線睇碟，播標清電視節目都可以升呢變高清。」
Ian又話，想用盡iDTV最好嘅畫質，買部機返屋企嗰陣其實要因應家居環境，調校部機嘅亮度、對比度、銳利度等；但一般用家點會識調校，所以呢個系列新機，特設獨有嘅AutoView智能全感系統，「開住部電視，系統會自行偵測到觀賞環境嘅照明狀況，同埋畫面嘅內容，自動調整畫面到最佳嘅畫質。」
Ian話，最高階嘅SV650型號仲係全港首部用咗直下式LED背光技術嘅iDTV，動態對比度達2,000,000：1，加埋每秒200格頻率更新畫面，減少殘影，令畫面更加流暢。