記協總幹事職位懸空好一段日子，估唔到最終畀煲呔「好朋友」進佔，禮賓府心戰室可以擔心少一瓣。今屆記協執委會有多張新面孔，下星期上任嘅總幹事亦然，就係莊曉陽。阿陽曾喺《明報》同《蘋果》工作，係八方舊同事，主要跑政治新聞，年前獲志奮領留英獎學金去英國倫敦大學亞非學院讀中東研究，雖然樂而忘返，但終歸鳥倦知還。
阿陽家陣係Freelancer，以前跑新聞時，曾被煲呔不客氣地形容係「好朋友」，佢熱愛長跑，足迹遍佈多國，動完腳動手，寫書《四十二公里的風光》，應該係香港獨家跑手作家，堪稱「香港村上春樹」。記協新總幹事歸位，日後有行家被鬧、被屈、被打，記得搵佢幫手。