「國產湯漢斯」馮正虎有家歸不得，滯留東京機場已經成個月，維權人士流落異鄉的確好凄凉，不過大家又唔使太擔心佢日常生活，因為大把人接濟佢，日用品、食物不缺。
終於有蔬菜食
馮正虎喺網上稱，自從佢滯留機場嘅事成為國際新聞後，好多空姐、機場人員慰問佢，有加拿大空姐睇完報紙知佢苦況，送上薄餅同沙律，馮正虎話係瞓機場廿幾日以來第一次食到蔬菜，因為平日都係乾糧醫肚，後來佢有個杯裝粉絲，用熱水冲食，由於久未有熱辣辣食物落肚，佢話心急得滯，趁熱食時燙親嘴㖭。
日前有旅客送咗六罐午餐肉畀馮正虎，有個東京大學教授係老相識，去完蒙古返日本時，竟然送咗幾包蒙古羊肉畀馮正虎，真正送羊入虎口，唔知馮正虎如何享用？據馮正虎講，呢個教授係中國問題專家，問佢有乜需要，馮正虎隨遇而安，「我甚麼都不缺，但很歡迎老朋友在這裏見面。」