中大校長劉遵義同張國榮外甥女麥嘉軒拉埋天窗在即，八方仲未諗到送乜嘢賀禮畀一對新人之際，中大附屬機構中文大學出版社已經率先誌慶，幫中大準校長夫人出書。不過大家唔好以為呢部著作係講述校長同校嫂嘅熱戀之路喎，新書叫《香港稅務：法例與實施說明2009-10》，係一本會計師同律師嘅實用手冊。
噚日收到中大出版社嘅新書推介，佢哋嘅出品素來學術價值太高，八方一般都冇乜點理。不過年近歲晚，又係一年一度進貢畀庫房嘅日子，見到有關稅務嘅書，八方先有興趣留意一下。一睇之下，最矚目嘅唔係新書嘅內容，而係個作者──麥嘉軒。
與另一會計師合著
呢位會計界女強人同中大校長劉遵義嘅戀情最近先至曝光，估唔到原來佢同中大一早已經咁好交情。麥嘉軒早喺05年已經開始同另一位執業會計師DavidSmith合著《香港稅務》，今年出到第五版。劉遵義喺04年開始出任中大校長，根據八卦雜誌講，二人都係聖保羅男女小學校友，幾年前喺社交場合結識。八方唔肯定中大幫麥嘉軒出書同劉遵義有幾大關係。
中大出版社前身係中文大學出版部，1967年成立，屬於非牟利學術機構，宗旨係「弘揚中西文化，傳播古今知識」。中大曾經幫知名學者許倬雲、饒宗頤、胡秀英等出書，未來中大校嫂能夠躋身其中，劉遵義真係獨具慧眼。
潑伊斯蘭債券冷水
講番本書，麥嘉軒親自撰寫嘅前言，提到最近廣受關注嘅伊斯蘭金融產品。佢提醒投資者，伊斯蘭金融產品本質類似債務融資，投資呢類產品可能會比傳統產品需要繳納更多稅款，例如印花稅，因而喺市場上失去優勢。候任中大校嫂果然勁，早喺杜拜世界危機前已經為伊斯蘭金融產品發出預警。
橫掂中大幫開麥嘉軒出書，不如幫校長同準夫人出本婚姻紀念特集，圖文並茂展示二人嘅甜蜜之旅。家陣大學籌錢咁艱難，劉麥準伉儷合著一部情書，將收益撥捐大學，一定可以造福學界。
mailto:[email protected]