直到今日，街機仲係猛打、猛入錢嘅《GundamVSGundamNEXTPLUS》，已經推出PSP版；除承襲街機版收錄內容、系統外，仲有原創模式同新增機體，17部作品總共60隻機體以上，正派一方有紅爆嘅獨角獸、00高達及新增WingGundam，反派就有新加入戰陣嘅自護號、《TurnA》入面嘅JMA-0530同F91嘅XMA-01，大量MA，論體積仲唔係魔高一丈？
文：阿洛
250個任務任做
對戰唔少得，劇情任務模式都大把！今次PSP版就包含超過250種戰鬥任務，而且更有滿足特定條件先會出現嘅隱藏任務，會有特別敵人，打低佢哋仲會有更多經驗值；不過隱藏任務會有失敗次數限制，一旦超過就會喺地圖消失，當中有啲更係失敗一次無Take2，未有把握就唔好試。
敵人嘅敵人就係朋友
街機咁Hit，全靠分組合作對戰，移植版當然亦支援4人連線分組對戰，邊個係人、邊個係鬼一眼睇晒。而除對戰及單人故事模式外，新增NEXT-PLUS模式亦支援合作、對戰，連線合作時2人可以一同挑戰選定任務，地圖、難度都可以自己揀；而連線對戰時，就可以使用各自培育嘅機體打餐飽，所以比起街機嚟講，又有另一番樂趣。
新增技能升呢
遊戲繼續有NEXTDash系統，連按跳躍兩次，就可以取消所有動作，即係隨時可做假動作。而PSP版亦加入經驗值升級等要素，透過任務過關所得經驗值，提升MS機體等級，另外亦可以增加新技能，效果包括提升攻擊力、耐久力、機動力、全體能力，或是增加戰鬥獲勝後所取得的經驗值、GP數等。
Profile
遊戲：《GundamVSGundamNEXTPLUS》
機種：PSP
製作廠商：NBGI
類型：動作
人數：1-4人