「政改方案」引不起討論氣氛，但係挑起泛民內鬥，老薑司徒華與老雀黃毓民對罵，另外在華叔眼中，陶君行係新丁，駛乜客氣，公開在電台罵之，少見也。泛民主派冇乜叻仔叻女新人浮現，來來去去都係嗰幾個，連甘乃威都算係第二代，冇命！香港政論/政壇人物之中，沈旭輝呢啲就係真正年青人嘞，但佢係學者型，唔參加政黨，泛民不妨以沈博士為樣辦，招攬呢類博士入黨。
有老友問，毓民搞局吖還是華叔搞局呢，搞到五區請辭變成泛民罵戰，不利民主發展噃。我哋點知咁多嘢吖，總之你搞我時我搞你，中國人通常係勇於內鬥，怯於外敵嘅。忽然想起，應該寫「搞局」還是「攪局」？老友次日回報：佢在書局見到一本新書：《挑戰錯別字》（商務出版），於是揭開睇吓，第一百六十八頁就有「搞」與「攪」之辨，應該係「攪局」，唔係「搞局」。「搞」有做、幹、從事、弄、設法獲得，作弄等義，如搞鬼、搞定、搞建設、搞衞生。「攪」指攪拌、擾亂、打擾，如攪勻、攪局、打攪；「搞」側重設法弄到，「攪」側重發生混亂。
哦，明白晒，以後切記寫「攪局」不寫「搞局」，「攪攪震」不是「搞搞震」。但係「搞」字筆畫較少，有時懶懶哋，容易寫錯。經朋友一講，搵到呢本新書，望吓先。記得以前壹仔有位校對吳順忠，不止校對清楚，直情教埋記者編輯寫字㖭，堪稱超級校對，家冇咗呢類高手幫忙，唯有自己盡量寫得小心啲。此書第五十五頁講「拙」與「絀」之分，筆拙、拙劣、古拙、相形見絀、左支右絀，第一百○一頁講「突」與「凸」，一百五十二頁講「脹」與「漲」，皆值得參考。中學生寫中文，易寫別子，此書有輔助性。大人都要睇o架，起碼啲議員在立法會常講廣東話，讀音唔好錯先啦，否則累到曾校長又要出聲糾正：「褫」不是「遞」，他日或會講埋「病入膏肓」，不是「病入膏盲」，咁就唔係幾好睇啦，陳克勤議員或者係第一個要買本書嚟學吓。