日本女星、《標殺令》演員栗山千明噚日喺尖沙嘴為代言嘅SHISEIDOWhiteLucent系列宣傳，同場仲有鄧麗欣（Stephy），林峯同「翻版徐子淇」Zelia等，不過講到性感，栗山千明就輸咗畀MandyLieu嘞。會上栗山千明只接受6條官方提問，又話自己注重美白同護膚，睡眠充足同埋食得好，更加係靚人必須喎。除咗講護膚，栗山仲話想繼續去荷李活發展，不過就有阻滯咁話：「最大障礙係溝通唔到，我英文唔係幾好。」
身體語言搭夠
栗山英文唔掂，但又同Stephy溝通到喎！Stephy自爆同栗山喺後台雞啄唔斷：「之前見過佢，今次未有機會送CD畀佢，不過佢都未走，可以再傾。」最離奇係Stephy話自己用英文同栗山傾偈，當記者話栗山唔係好識英文時，佢就好尷尬話：「用身體語言囉，同我學過手語嘛，同埋我都諗住學完英文再學普通話，之後就再學日文o架。」又話為拍新廣告，今個夏天唔敢曬太陽，以免曬黑。
採訪：梁錦雯
攝影：仇志德