東亞運，東亞運，街頭巷尾東亞運，大家要創造傳奇一刻之時，原來大部份場地都拒絕我們──寵物們──參與，無錯，我們或四腳或有翼，卻不代表不屬於「全城投入」一分子，況且，東仔亞妹兩個都是吉祥「物」，你從不了解，我們絕對比得上欄王劉翔、水怪張琳！全城動物站起來，公投主辦「動物東亞運」！
記者：梁佩芬
攝影：楊錦文、陳陶鈞
場地提供：寵物新天地（24886736）
狗界劉翔
Hi，我是小牧羊犬Mara。與出名靈活跑得快的積羅素犬MoyMoy爭做欄王，哈，竟給我跑贏牠一個狗鼻榮登狗界劉翔！主人都說牧羊犬品種優良，但其實我只不過是參加過香港一些狗會比賽，雖奪得冠軍，實際卻與MoyMoy相差甚遠。
狗界欄王 登登登凳……小牧羊犬
動物能外出參加比賽，絕不比人類參與奧運容易，先要在小型比賽勝出，再在大型狗會比賽得到前列位置，才有資格出賽，像MoyMoy曾往美國比賽的，少之又少，雖敗猶榮。今次決戰「狗界東亞運」，賽果竟然有啲爆冷！
血統優良狗健將
講到「近」，其實我狼狗Nutz也曾風光。我爺爺Orry係世界第一隻三奪世界警衞犬大賽嘅狼狗，血統優良！而我喺十個月大時，已開始被訓練成為一隻專跑障礙賽嘅狗，即是要跳圈、跨欄、過黑洞、S形跑、上平衡木、三角板及搖搖板。主人常說狼狗動力大、速度高、聰明堅忍。你睇，我英姿颯颯，四腳幼長，有50厘米高度，肌肉結實，頸粗且壯，甚有劉翔嘅架勢！曾奪全港狗隻服從賽冠軍。只是，我年紀已大，反而身體小小的Mara和MoyMoy係後起之秀！
大熱倒灶
Nutz，你都唔使太謙。不過，我MoyMoy又確係「近」喎！積羅素犬嘅祖先係工作犬，動作靈活，性格獨立，不過有時都會露出惡樣。好在，主人莊明順將我訓練到變成一隻乖巧小狗。前年，我仲前往美國參加「敏捷犬世界大賽」，得到小組賽第一名，可惜，入到半準決賽，對手實在太強喇，跑得唔夠快。但好似我咁去過美國比賽嘅，真係少之又少，雖敗猶榮。而且，不是我自誇，積羅素犬體形小，早已深得居住環境細小嘅香港人歡迎，加上靈活跑得快，喺小型狗隻界比賽，一向係我啲朋友稱王稱霸。
其他單挑項目
狗隻能跑能跳能玩平衡木，可別忘了出水還能游。而今屆還有隻小鸚鵡憑一張利嘴，懂得叫自己做「阿寶」，經主人Peggy細心訓練後，舉重做SitUp甚至玩吊環都毫無難度。牠倆不仰慕劉翔，卻誓要單挑其他運動項目。
金毛游水嘆慢板
我BoBo嘅偶像係首位中國泳手破男子八百米游泳世界紀錄嘅張琳。差不多每天都到MoyMoy、Mara及Nutz三隻狗居住的八鄉家泳池練游水。夏天幾乎天天游，冬天最多一星期三次。金毛尋回犬最愛游泳，不過我個性比較悠閒，不愛速度，只求在水裏慢慢嘆，所以只能飲張琳水尾！
單嘴大迴環更勝李寧
我懵豬跟你們完全不同，只有兩隻腳，全身有灰黑色羽毛的非洲灰鸚鵡。哈哈，我強項唔係運動，係食！如果可以同大食王小林尊比拼，絕不遜色，可是，我最多吃蛋、水果及花生，不能吃熱狗。咁我仲參賽？因為我佔盡地利，我家住奧運站的屋苑，站名是紀念李麗珊奪得奧運金牌而設，所以，我一早知道做鸚鵡嘅終極目標，就係參加奧運會！我自恃智商高，希望出賽時多落嘴頭，將GoodMorning和HowareYou講成GoodMornYou、HowareYou和ILoveYou又變成HowILoveYou，得觀眾評判開心啦，哈哈。但都話我智商高，當我睇過電視上重播李寧吊環後，我已懂得用嘴玩吊環！只係人用手我用口。嘻，實不相瞞，鸚鵡嘅專注力只有5分鐘，每樣東西都不能做多過30秒！唉，但今屆東亞運竟不設體操項目，卻有拉丁舞比賽，奇怪奇怪！
