楊千嬅噚日以大使身份到尖沙嘴出席基金記者會，佢即場呼籲大家參加反吸毒徵文比賽，原來千嬅讀書時都有投稿去報館，只係從來冇刊登過，不過千嬅對自己文筆非常有信心，因為佢曾經幫雜誌寫過專欄。千嬅又大讚老公丁子高寫嘢都唔差，因為好多時都要負責寫新聞稿，至於有冇互寫情書，千嬅就話冇，因為佢份人比較心急，會打電話直接講喎。